ചന്ദ്രിക തെളിയുമീ രാവില് നീയെന്റെ
മാനസ മണിയറ തുറന്നു വന്നു,
മധുരിത ഗാനത്തിന് ലഹരിയില് ഞാന് നിന്റെ
ചന്ദന ഗന്ധം നുകര്ന്നു നിന്നു...അന്ന്
നമ്മള് നമ്മളെ മറന്നു നിന്നു .
(ചന്ദ്രിക തെളിയുമീ രാവില്....
മോഹിനി യാമിനി കണ്തുറന്നു-മെല്ലെ
മോതിര ക്കൈകളാല് താളമിട്ടു;
ആനന്ദ രാഗങ്ങള് മൂളുവാന് രാക്കിളി
ആരാമത്തിണ്ണയില് വന്നു ചേര്ന്നു-അവന്
തന്നിണക്കിളിയോടു ചേര്ന്നു നിന്നു.
(ചന്ദ്രിക തെളിയുമീ രാവില്....
ആകാശ വീഥിയില് ആയിരം താരകള്
കണ്തുറന്നെന്തിനൊ നോക്കിനിന്നു;
ചക്രവാളത്തിനുമപ്പുറം സൂര്യനും
എത്തിനോക്കീടാതെ കാത്തു നിന്നു- നാം
അനുരാഗ നൊമ്പരം ആസ്വദിച്ചു .
(ചന്ദ്രിക തെളിയുമീ രാവില്....